(via Kabataan Partylist Southern Tagalog)

KABATAAN, IPAGPATULOY ang DIWANG MAKABAYAN
na PINAGLIYAB ng KAMATAYAN ni NINOY!
TUTULAN ang KONTRA-MAMAMAYANG PATAKARAN ni NOYNOY!
HINDI SAYANG ang MAMATAY para sa MAMAMAYAN

     Aug 21, 1983 – pinaslang si dating Senador Benigno “Ninoy” Aquino Jr. Bilang kinikilalang oposisyon sa mga palakad ni Ferdinand Marcos, ang kamatayan ng isa sa pinaka batang naging senador ng bansa ay nagsilbing inspirasyon para sa maraming kabataan at mamamayan na bawiin ang kapangyarihan at karapatang ipinagkait ng batas militar. Taong 1986, kanilang napatalsik ang diktador. Hanggang sa kasalukuyan, hindi napapawi sa ating alaala ang sambit ni Ninoy, “The Filipinos are worth dying for.” (Hindi masasayang ang kamatayang alay sa mga Pilipino.)

     Makalipas ang mahigit tatlong dekada, isang anak ni Ninoy ang siyang pangulo ng bansa. Subalit, nananatili ang pagdarahop dulot ng pagpapabaya at pang-aabuso. Malubha pa, higit na naging matingkad ang pagsasamantala sa ating mga kababayan kung kailan napakarami ang nasalanta ng nagdaang pagbagyo, pag-ulan at pagbaha.

MARAMING MAMAMAYAN ang NAMAMATAY

     May 74,000 pamilya sa Timog Katagalugan  sng nasalanta ng bagyong Gener at hanging Habagat ayon sa impormasyong nakalap ng grupong Southern Tagalog Serve the People Brigade. Hindi pa kasama sa bilang na iyan ang maraming hindi pa naitatala. Samantala, umabot sa 60 ang namatay sa buong bansa . Karamihan ng mga apektado ay mga maralitang naninirahan sa mga tabing-dagat, lawa at ilog. Itinulak sila ng kawalan ng ikabubuhay at mahirap na kalagayan upang manirikan sa mga lugar na ito. Dahil sa kawalang kakayahang tustusan ang papalaking gastusin, lalo silang bulnerableng magkasakit, at maanuran ng bahay, ari-arian at bangka. At habang naging madalas ang suspensyon ng klase, hindi naman tumigil ang pagtaas ng presyo ng pangunahing bilihn. Noong Agosto 7, halimbawa, ay tumaas ang presyo ng gasolina mula ng Php 0.80 kada litro. Nagtaas din ang presyo ng kuryente.

     Habang noo’y nanawagan si Ninoy at ang iba pang kabataan at mamamayan ng isang pamahalaang naglilingkod sa mga Pilipino, ngayon nama’y higit na naging lansakan ang pagpapabaya sa hanay ng mga nanunungkulan na siya dapat magtitiyak na malayo sa kapinsalaan ang kabataan at mamamayan.

PINABABAYAAN ang MAMAMAYAN

     Isang matingkad na halimbawa mismo ang administrasyong Aquino:

1. Hindi niya prayoridad ang paghahanda sa mga sakuna. Pinigilan pa niya ang mga ahensya ng gubyerno sa paggamit ng calamity fund para dito. 
2. Hindi niya pinagbabawalan ang mga kumpanyang nangangasiwa sa mga hydro-electric dams na pataasin nang higit sa kailangang antas ang tubig sa mga ito, na siya nilang kalakaran para mapalaki ang kakayahang lumikha ng kuryente mula sa lakas ng tubig habang di gumagastos nang malaki. Sa gayon, nakatitipid sila habang nakapagpapalaki ng singilin sa pagbebenta ng kuryente. Kaya naman, madalas na umapaw ang mga dam at kailangang buksan ang mga flood gates, na siyang nagpapalubog sa mabababang lugar sa baha. 
3.  Hindi ito nagsagawa ng malakihang operasyon upang tanggalin ang burak sa mga lawa at lagusan ng tubig. 
4. Hindi ito nagsagawa ng signipikanteng pagsisikap upang malawakang matamnan ng puno ang ating nakakalbong kagubatan. 
5. Kinansela nito ang mga proyektong pangkontrol ng baha nitong maagang bahagi ng taon.

MAMAMAYAN ang SINISISI sa KALAGAYANG SILA ang BIKTIMA

     Subalit ang higit na malala, upang pagtakpan ang kanilang kapabayaan ay ipinapasa pa ng mga nasa katungkulan at maging ng mga nasa mass media ang sisi sa mismong mga maralita! Diumano’y sila ang sanhi ng pagkipot ng mga lagusang-tubig at pagbaha. Ang Pang. Aquino mismo, anak ni Ninoy, ay nangunguna sa pagpaparatang sa maralita sa paglubha ng pagbaha. Kaya naman, ang kanyang solusyon ay malawakang demolisyon!

     “I have just received instructions from the President that if push comes to shoves, we will have to blast these houses.” (Katatanggap ko lamang ng atas mula sa Pang. Aquino na kung magkakamatigasan, kailangang pasabugin namin ang mga bahay na ito.) – Ito mismo ang pahayag ni DPWH Sec. Rogelio Singson hinggil sa mga kabahayan ng may 195,000 tirahan sa tabi ng mga lagusang-tubig sa Kamaynilaan at sa paligid ng Lawa ng Laguna. Ang kakatwa, karaniwang ang mga relocation site na iniaalok sa mga maralita ay mga bahain ding lugar, at malayo sa mapagkukunang-trabaho. Samantala, sa pagpapatalsik sa mga maralita sa mga tabing-lawa at ilog ay lalo lamang mabubuksan ang mga lugar na ito sa mga pribadong korporasyon sa ilalim ng public-private partnership program. Karaniwang ang mga korporasyong ito ay hindi pinapatawan ng mahihigpit na regulasyon.

ITINUTULAK ang MAMAMAYAN sa NAKAMAMATAY na KALAGAYAN

     Masasabi pa ngang hindi lamang basta pabaya ang administrasyong ito, kundi responsable pa nga sa pagbaha. Taliwas sa opinyon ng ilan na ang nagdulot ng pagbaha nitong buwang ito ay ang mga maralita, iba ang ipinapakita ng katotohanan:

1. Patuloy ang lantarang pagkalbo at pagpatay sa ating kagubatan ng mga korporasyon sa pagmimina at pagtotroso na patuloy na ineengganyo ng administrasyong Aquino na mamuhunan sa ating bansa, bagamat wala naman silang signipikanteng kontribusyon sa ating ekonomya. 
2. Patuloy ang pagpapalit-gamit ng lupa para sa mga plantasyon, subdivision, eco-tourism projects at rancho ng mga dayuhang kumpanya at mga malalaking haciendero tulad ng pamilyang Cojuangco-Aquino. Lalo lamang nitong pinupwersa ang mga taga-kanayunan na lumikas at mapadpad kahit sa mga lugar na peligrong bahain.
3. Kalakaran din ng administrasyong ito ang pagpapababa ng sahod at kawalang programa para sa katiyakan ng empleyo, kaya lalong maraming Pilipino ang naghihirap at nagiging bulnerable sa mga sakuna. Sa madaling salita, ang administrasyong Aquino pa ang nagtutulak ng pagkawasak ng kapaligiran at kabuhayan nating mga Pilipino, at ng kinabukasan ng kabataan.

     Mahigit tatlong dekada na ang nakalilipas mula nang paslangin si Ninoy. Bilang kabataan, ating ipagpatuloy ang diwang makabayan na pinagliyab ng kanyang kamatayan. Ating hamunin ang administrasyong ito na tigilan ang pagpapabaya, pang-aabuso at pagbabaling ng sisi sa mamamayang dapat ay kanyang pinaglilingkuran.

League of Filipino Students - UPLB
August 08, 2012
News Release

LOS BAÑOS, LAGUNA - Various student organizations and people’s party-lists conduct a relief and rehabilitation mission under the banner of Serve the People Brigade (STPB) as part of the celebration of the upcoming International Youth Day on August 12.

The STPB is an initiative providing immediate relief to the provinces of Southern Tagalog, particularly Laguna. Stationed at the Vega Center in Los Baños, it primarily seeks to collect relief goods and to invite volunteers for the relief distributions.

“The youth of the University of the Philippines Los Baños (UPLB) and nearby communities launched this project to relive the true essence of bayanihan among the Filipino youth.” Allen Lemence, League of Filipino Students-UPLB spokesperson, and one of the coordinators of the STPB said. He also added that this activity serves as a clear manifestation that the mobilizing force of the people, when spearheaded by the youth, can surpass even the fiercest storms.

As of 7:01PM today, Lemence said that the STPB had a total of 133 walk-in donors, financial donations amounting to more than 15,000Php, and 200 relief packs in four multi-cabs full of clothes and goods. The STPB also had more than 100 volunteers today who helped in publicizing the endeavor, packing relief goods, going house-to-house to solicit goods and other resources.

The relief distribution in Mabitac, Laguna and Barangay Tadlac, Los Baños is scheduled tomorrow. More than a thousand families will receive the relief packs.

“Given the overwhelming support of the UPLB community and nearby communities, the STPB is in need of more donations and more volunteers in the relief distributions for the upcoming days. More so, we call on UPLB students to come out, help and continue upholding the mark of every Iskolar ng Bayan in serving the people.” Lemence concluded.

The STPB is expected to continue receiving donations and relief goods for the whole month of August. #

For inquiries on how you can donate or volunteer, you can contact the STPB secretariat at 0915 276 8715.

Pahayag ng pambansang tanggapan ng League of Filipino Students sa paggunita ng ika-anim na anibersaryo ng pamamaslang kay Rei Mon “Ambo” Guran, tagapagsalita ng LFS sa Aquinas University of Legazpi. Ibinahagi nitong ika-31 ng Hulyo, 2012 sa Bulan Freedom Park sa Bulan, Sorsogon.

Pinakamataas na pagpupugay at mapanlabang pagbati!

Sa pag-alaala natin sa ika-anim na taong paggunita sa kamatayan ng ating kasamang si Rei Mon “Ambo” Guran, binabalik-tanaw natin ang kanyang naging buhay at pakikibaka sa hanay ng mga masang estudyante at mamamayan bilang isang masugid na tagapagtaguyod ng kanilang interes at ng mga prinsipyo ng ating liga. Isa sa mga prominenteng lider-estudyante sa rehiyon ng Bikol, ang araw ng pagkawala ni Ka Ambo ay naging isang madilim na kasaysayan ng ating mapagpalayang kilusan. Ngunit sa kanyang pagkawala ay hinding-hindi malilimot ng kabataan at mamamayan ang kanyang prinsipyo, paninindigan, at adhikain na mananatiling buhay sa alaala ng buong sambayanan.

Sa gitna ng tumitinding krisis na nararanasan ng mamamayan, isinilang si Ka Ambo at namulat sa gitna ng malakolonyal at malapyudal na sistemang panlipunan. Walang pag-iimbot na inalay niya ang kanyang oras, panahon, at kanyang buhay; niyakap niya ang hirap, sakripisyo, at maging ang kamatayan alang-alang sa pagtataguyod ng interes ng kabataang Pilipino at ng buong mamamayan. Walang pag-iimbot siyang nag-organisa, nagmulat, at nagpakilos laban sa numero unong ugat ng kahirapan: ang Imperyalismong Estados Unidos.

Sa ilalim ng rehimeng US-Aquino, unti-unting nailalantad ang katangian ni Noynoy Aquino bilang isang pangulong tagapaglingkod at tagapagtaguyod ng interes ng imperyalistang EU at ng mga kauri nito bilang isang pangulong haciendero. Sa dalawang taon pa lamang ng panunungkulan nito sa kapangyarihan ay papatindi ang pasistang atake ng rehimen sa mga mamamayan sa ilalim ng Oplan Bayanihan na pagpapatuloy lamang ng madugong Oplan Bantay Laya ng nakaraang rehimen. Ito ang malinaw na programang kontra-insurhensya ng reaksyunaryong estado laban sa hanay ng patuloy na lumalakas na rebolusyonaryong kilusan. Pinasasahol pa ito ng higit pang panghihimasok ng mga tropang Kano sa bansa sa ilalim ng Visiting Forces Agreement (VFA), na subok sa karanasan at kasaysayan ng pananatili ng baseng Kano sa bansa ay napakarami nang ginawang paglabag sa karapatang pantao ng mga mamamayang Pilipino. Maging sa kasalukuyan, alam natin na walang ibang layunin ang mga ito kundi paghusayin ang reaksyunaryong hukbo ng estado sa pamamagitan ng paglunsad ng mga exercises laban sa kanyang mga mamamayan at sa pagsupil sa lumalakas na hanay ng rebolusyonaryong kilusan.

Ngunit sa kabila ng pasistang atake ng estadong ito ay hindi nangimi ang malawak na hanay ng kabataan at mamamayan na magpursigi sa pagsulong sa pambansa-demokratikong kilusan sa kalunsuran at kanayunan. Katulad ni Ka Ambo, dapat tayong magpakatatag sa gitna ng hirap at sakripisyo.

Sinasabi natin na marahas ang digma, ngunit mas marahas ang dahilan nito. Dapat tayong higit na magpursigi at magpunyagi sa pagsusulong at pagpapalawak ng ating pambansa-demokratikong hanay, tungo sa libu-libo hanggang sa milyun-milyong kabataan at mamamayan na tatahak  at magpapatuloy sa nasimulang pakikibaka ni Ka Ambo. Siya ay isa sa magsisilbing huwaran at ilaw sa landas na tatahakin ng kabataan at mamamayan tungo sa landas ng pagrerebolusyon—tungo sa higit na pagwawakas at ganap na pagpapabagsak sa imperyalismo, burukrata-kapitalismo, at pyudalismo hanggang sa maitaguyod ang isang sosyalistang lipunan na magwawakas sa tanikala ng kahirapan at kawalan ng hustisya.

Hustisya para kay Ka Ambo Guran!

Hustisya para sa lahat ng biktima ng pampulitikang pamamaslang!

Wakasan ang Oplan Bayanihan sa ilalim ng Rehimeng US-Aquino!